في حب "يوم الجمعه"

بقلم: أ.د.عمرو حسن الحسني أستاذ المخ و الأعصاب جامعة القاهرة

#بوست_الجمعه النهارده تأخر كثيرا

فكان يجدر ببوست الجمعة أن يكون له من أسمه نصيب و يتحدث عن يوم الجمعة

اليوم ده يوم مش عادي في أسبوعنا و الله

لو هتبص له علي أنه weekend و بس ..يبقي فرغته من مضمونه 😒

١- كنت زمان و انا طفل بأحب يوم الجمعه عشان إجازة من المدرسة و عشان ماما عفاف الهلاوي و سينما الأطفال و فطار الجمعة الجماعي و بس. 🤡

٢- كبرت شوية و حبيت صلاة الجمعة وبقي ليا رأي في خطبة الجمعة و أروح صلاة الجمعة أقيم الشيخ🤓 و طريقته و موضوعه و أتصيد له الأخطاء النحوية 🧐.و أعود إلي البيت سريعا و افتح التلفزيون و أعمل أي حاجه لحد ما عالم الحيوان بصوت محمود سلطان يخلص😂 و يجيي الشيخ الشعراوي 😍

و بعده الساعه ٣ عادة ماتش للأهلي بتعليق أحمد عفت و يا سلااام ⚽️⚽️ ثم فاصل من النكد الأسري و الندب الكلاسيكي مع الأستاذة حياة واصف في برنامج " حياتي" 😭

٢- كبرت شوية كمان.. و صار أهرام الجمعة و بريد الجمعة للراحل عبد الوهاب مطاوع من أهم طقوس الجمعة .. و كنت أحتفظ بصفحة بريد الجمعة لسنوات طويلة .. لغاية دلوقتي مش عارف ليه و كان هدفي ايه من كده 😂

٣- كبرت شوية كمان .. و ارتبطت بها😍🙈 ..في البداية ارتباط مذبذب و مراهق .. شوية افتكرها و شوية أنساها و شوية أطنشها

..هي سورة الكهف .. آة و الله

و مرت الأيام .. حتي وقعت عيني علي تويته للمرحوم محمد يسري سلامة يوصي فيها بقراءة سورة الكهف .. و بيقول جرب تواظب علي قرايتها و ستجد خيرا كثيرا في أسبوعك

و بإنتهازية شديدة قررت المواظبة عليها عشان أشوف أسبوعي هيحصل فيه ايه

حتي ارتبطت بها ارتباط العاشقين.. فأصبحت قرائتها هي أجمل ما في يوم الجمعة .. و كل مرة اقول يااه علي التويته اللي بيصلك ثوابها أسبوعيا من لسنوات يا عم يسري..!

٤- كان يستوقفني في أول إرتباطنا ما يستوقف الكثيرين كقصة سيدنا موسي و سيدنا الخضر عليهما السلام .. و كيف أن أقدار الله القاسية ظاهرا تحمل في باطنها الرحمه و البشري كقتل الغلام و خرق السفينه ..و قصة يأجوج و مأجوج و المهندس المعماري العبقري ذو القرنين

٥- و لكن لما قربت منها اكتر .. فهمتها اكتر .. و لقيت فيها درر تانيه ربما لا نلتفت ليها كثيرا .. هناك ٤ آيات لوحدهم كافين و الله يكونوا عقيدة و منهج حياة.

٦- الآية الأولي:عقيدة

"قُلْ إِنَّمَا أَنَا بَشَرٌ مِّثْلُكُمْ يُوحَىٰ إِلَيَّ أَنَّمَا إِلَٰهُكُمْ إِلَٰهٌ وَاحِدٌ ۖ فَمَن كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا (110)

لا تشرك أي حد"

شرك أكبر و لا حتي شرك أصغر من رياء و غيره

٧- الآية الثانية : منهج

"وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا ۖ وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا (28)"

ربنا عارف مرافقة الصالحين صعبة و ممكن دمهم يبقي تقيل علي قلبك و أن الناس الروشه دمهم أخف 🕺💃 بس لو بعاد عن ربنا .. أوعي عينيك تزوغ عليهم .. أجمد و أنشف يا بطل .. دول ممكن يكونوا غافلين بإرداتنا متروحلهمش

٨- الآية الثالثه: مراقبة تنفيذ المنهج

"وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَٰذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا ۚ وَوَجَدُوا مَا عَمِلُوا حَاضِرًا ۗ وَلَا يَظْلِمُ رَبُّكَ أَحَدًا (49)"

الكتاب مش هيسيب حاجه خالص كده🤔 .. مش هيفوت يعني لا كلمه و لا حركة و لا غمزة و لا همسة 😏.. طب و بعدين يا عم😭 .. ده احنا يومنا بايظ أصلا .. إزاي مش هتفوت.. هتلاحق إزاي ع الكتابة طاه😥

٩ - الآية الرابعة : إنحراف المنهج

"قُلْ هَلْ نُنَبِّئُكُمْ بِالْأَخْسَرِينَ أَعْمَالًا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا"..آية مرعبة

فرحان بنفسك و شايف نفسك و حاسس أنك تستحق أنك تكون رئيس مجلس إدارة الكرة الأرضية 🌎 و أن البشرية محظوظه بوجودك وأن إسهاماتك الكونية غير مسبوقة

.. بالعكس.. ابسولوتلي.. أنت لا شيء.. انت ضال ..عارف يعني ايه ضال ..يعني مالكش ٣٠ لزمه و كل اللي عملته في حياتك هباء منثور .. نعوذ بالله أن نكون منهم ..

١٠- و يزاحم متعة قراءة الكهف لحظة أخري هي عندي أجمل لحظات الجمعة علي الإطلاق.. هي لحظة السجدة.. آه و الله

..فمن هدي النبي صلي الله عليه وسلم قراءة سورة السجدة و الإنسان في صلاة فجر الجمعة .. قليل من المساجد مازالت تفعلها (حتي قبل الاغلاق طبعا)

سجدة سورة السجدة لها طعم مختلف عن باقي سجدات التلاوة ال ١٤ بالقرآن و يا سلام لما تقوم منها فتسمع التعبير القرآني البديع (تتجافي جنوبهم عن المضاجع.. 😍😍)

لو لحقت صلاة جماعة الفجر متأخرا و فاتتك السجدة..فاتك كتير و الله

يوم الجمعة نعمة كبيرة أوي

تمتعوا بها